Бишкек, 19.05.26. /Кабар/. Күз-кыш мезгилине даярдык көрүүнүн алкагында "Чакан ГЭС" ААКтын карамагындагы 4 гидроэлектр станциясында капиталдык оңдоо иштери жүргүзүлөт. Бул тууралуу Энергетика министрлигинен билдиришти.
Маалыматка ылайык, энергетикалык тутумдун ишенимдүүлүгүн жогорулатуу жана авариялардын алдын алуу максатында төмөнкү ГЭСтердин гидроагрегаттары капиталдык оңдоодон өтөт:
- ГЭС-3 (№1 гидроагрегат);
- ГЭС-4 (№1 гидроагрегат);
- ГЭС-5 (№2 гидроагрегат);
- ГЭС-6 (№2 гидроагрегат).
Учурда ГЭС-6дагы №2 гидроагрегаттын капиталдык оңдоосу кызуу жүрүп, статор оромосунун изоляциясы алмаштырылды. Бул иштер июнь айынын ортосунда толук бүтөрү пландалууда. Мындан тышкары, Быстровка ГЭСи менен ГЭС-1де орточо оңдоо иштери каралган (Быстровкадагы жумуштар ийгиликтүү аяктады).
Жалпысынан 2026-жылы негизги жана көмөкчү жабдууларга, имараттарга 299 утурумдук оңдоо иштери жүргүзүлөт. Ошондой эле станциялардын ишин турукташтыруу үчүн өздүк муктаждыктарга 8 жаңы трансформатор, тиристордук козгоо системасы жана 3 комплект вакуумдук өчүргүчтөр сатып алынып, орнотулат.
Жүргүзүлүп жаткан комплекстүү иш-чаралар кышкы жогорку жүктөм учурунда калкты туруктуу электр энергиясы менен камсыз кылууга жана өлкөнүн энергетикалык коопсуздугун чыңдоого багытталган.
