Бишкек, 17.04.26. /Кабар/. Илим, жогорку билим берүү жана инновациялар министринин биринчи орун басары Гүлнура Мамырова Кореянын Ыраакы Чыгыш университети, Чхунбук технопаркы жана инвестициялык компаниялардын өкүлдөрү менен жолугушту.
Министрликтен билдиришкендей, тараптар жогорку билим берүү, инновация жана инвестициялык долбоорлорду ишке ашыруу багытында кызматташууну талкуулашты.
Өзгөчө көңүл төмөнкү маселелерге бурулду:
- студенттердин жана окутуучулардын академиялык мобилдүүлүгүн кеңейтүү;
- энергетика жана кайра жаралуучу энергия булактары жаатында адистерди даярдоо;
- заманбап лабораторияларды түзүү жана технопарктарды өнүктүрүү;
- илим тармагына чет өлкөлүк инвестицияларды тартуу.
Мамырова белгилегендей, бул кызматташтык инженердик кадрларды даярдоого жана заманбап технологияларды киргизүүгө жаңы мүмкүнчүлүктөрдү ачат.
“Жолугушуунун жыйынтыгында биргелешкен долбоорлорду ишке ашырууга багытталган Өз ара түшүнүшүү жөнүндө меморандумга кол коюлду”,– деп айтылат маалыматта.
