Бишкек, 17.09.25. /Кабар/. Кыргызстандын Россиядагы элчиси Кубанычбек Бөкөнтаев Москва мамлекеттик лингвистикалык университетинин (ММЛУ) «Айтматовдук окуулар» эл аралык долбоорунун алкагында Чыңгыз Айтматовдун чыгармачылыгына арналган лекциялардын сериясынын салтанаттуу ачылышына катышты.
ТИМден билдиришкендей, элчи дүйнөгө белгилүү жазуучу, Кыргыз Республикасынын коомдук жана мамлекеттик ишмери, дипломат Чыңгыз Айтматовдун жалпы чыгармачылыгына жана дипломатиялык ишмердүүлүгүнө арналган баяндамасы менен чыгып сүйлөп, жазуучунун дүйнөлүк адабияттын жана азыркы кыргыз дипломатиясынын өнүгүүсүнө кошкон зор салымын белгилеп кетти.
Иш-чарага ММЛУнун 60тан ашык студенттери, аспиранттары жана окутуучулары катышты.
Ошондой элчи Кубанычбек Бөкөнтаев ММЛУнун ректору И.Краева менен жолугушту. Анда гуманитардык билим берүү тармагында Кыргызстандын жогорку окуу жайлары менен ММЛУнун ортосундагы эки тараптуу кызматташуунун келечеги жана гуманитардык билим берүү чөйрөсүндөгү университеттер аралык кызматташтыкты чыңдоо талкууланды.
Элчи жаштарды билим берүү жана тарбиялоо максаттарын көздөгөн «Айтматовдук окуулар» сыяктуу эл аралык долбоорлорду өткөрүүнүн маанилүүлүгүн белгиледи.
