Бишкек, 18.09.25. /Кабар/. Бүгүн, 18-сентябрда Т. Абдымомунов атындагы Кыргыз улуттук академиялык драма театрында Кыргыз Республикасынын эл сүрөтчүсү, “Даңк” медалынын ээси, мамлекеттик Туунун авторлорунун бири Жусуп Матаевди акыркы сапарга узатуу аземи өттү.
Маданият министрлигинен билдиришкендей, зыйнатка министрлер кабинетинин төрагасынын орун басары Эдил Байсалов, маданият, маалымат жана жаштар саясаты министри Мирбек Мамбеталиев, Сүрөтчүлөр союзунун төрагасы Жакшыбек Жунушев жана бир катар коомдук, маданий ишмерлер катышты.
Сөз сүйлөгөндөр маркумдун кыргыз искусствосуна кошкон салымын, чыгармачылык мурастарын жана инсандык бийик сапаттарын белгилешип, анын ысымы улуттук маданияттын тарыхында түбөлүк каларына басым жасашты.
Жусуп Матаев “Токтогул Сатылганов”, “Кыз куумай”, “Байбиче” сыяктуу эмгектери жана Кыргыз Республикасынын мамлекеттик Туунун авторлорунун бири катары элибиздин эсинде сакталып калат.
Маркумдун сөөгү Ала-Арча көрүстөнүнө коюлду.
