Бишкек, 17.06.26. /Кабар/. "Аалам" эл аралык мектебинин (AIMS Razzakov) 12-классынын окуучусу Аскар Абдиев физика боюнча 10-Европа олимпиадасында коло медаль жеңип алды.
Агартуу министрлигинен билдиришкендей, ал Кыргызстандын тарыхында бул олимпиададан алгачкы медалды утуп берген окуучу болуп калды.
Ошондой эле "Газпром Кыргызстан" мектебинин 11-классынын окуучусу Айтегин Эмилбеков Ардак грамотага татыды.
Белгилей кетсек, олимпиада 12-16-июнда Швециянын Гётеборг шаарында өттү. Бул абройлуу мелдешке дүйнөнүн 41 өлкөсүнөн 199 эң мыкты окуучу катышып, теориялык жана эксперименталдык татаал тапшырмаларды аткарышкан.
