Бишкек, 08.12.25 /Кабар/. Кыргызстандын энергетиктери Татарстанда чыңалууда иш алып баруу боюнча окуудан өтүшүүдө. Бул тууралуу Энергетика министрлигинен билдиришти.
Ведомство башка өлкөлөр менен кызматташуунун алкагында, энергетика тармагында тажрыйба алмашуу, заманбап технологиялар менен окутууларды жүргүзүү боюнча сүйлөшүүлөрдү түзүп келет.
Буга ылайык, "Кыргызстан улуттук электр тармактар" ААКтын филиалы Бишкек электр тармактар ишканасынын 8 адамдан турган 2 бригадасы Татарстандын Заинск шаарында жогорку чыңалуудагы аба, кабелдик электр берүү чубалгыларында жана бөлүштүрүүчү түзүлүштөрдө жумуштарды алып барууну үйрөнүү үчүн билимин жогорулатып, тажрыйба алмашууда.
Мындай пилоттук долбоорду ишке ашыруу жөнүндө чечим “Кыргызстан УЭТ” ААКтын жумушчу тобунун Казань шаарына болгон иш сапарында кабыл алынган. Татарстан тарап, биздин кызматкерлерди бекер окуутууга даяр экендигин билдирип кат жөнөткөн. Аталган окутуулар 1-декабрдан 16-декабрга чейин өткөрүлөт.
Окутуунун жыйынтыгы боюнча бригадалардын коопсуздугу үчүн чыңалууну жөнгө салуу учурунда жеке коргонуунун жаңы комплекттери менен жабдуу маселеси каралат.
