Бишкек, 04.08.26. /Кабар/. Бишкекте заманбап бий боюнча дүйнө чемпионатынын расмий тандоо туру — Fusion Concept Qualifier Kyrgyzstan 2026 өттү.
Маданият, маалымат жана жаштар саясаты министрлигинен билдиришкендей, мелдешке өлкөнүн бардык аймактарынан келген 400дөн ашуун бийчи катышып, дүйнөлүк чемпионаттын финалына чыгуу үчүн күч сынашты.
Иш-чара Маданият министрлигинин колдоосу менен уюштурулуп, ага эл аралык деңгээлдеги бийчилер жана калыстар катышты.
Жыйынтыгында Bogdan The Flava & Luka дуэти жеңүүчү аталып, сентябрь айында Франциянын Париж шаарында өтө турган Fusion Concept дүйнөлүк чемпионаттын финалында Кыргызстандын атынан чыгуу укугуна ээ болду.
Уюштуруучулардын маалыматына ылайык, мелдеш жаш таланттарды колдоого, көчө бий маданиятын өнүктүрүүгө жана кыргыз бийчилерин эл аралык аренага чыгарууга багытталган.
