Бишкек, 16.06.26. /Кабар/. Илим, жогорку билим берүү жана инновациялар министрлигинде өлкөдөгү спорттук медицинанын келечегин талкуулаган ири тегерек стол өттү.
Ведомстводон маалымдашкандай, иш-чараны Дене тарбия академиясы менен Медициналык академия биргелешип уюштурду.
Министрдин орун басары Лира Сулайманова белгилегендей, спорттук медицина заманбап спорттун ажырагыс бөлүгү болуп саналат жана учурда бул тармакта кадрдык потенциалды чыңдоо, диагностика жана реабилитациялоо боюнча заманбап технологияларды жайылтуу зарылчылыгы турат.
Анда спортчулар менен иштей турган адистештирилген спорттук дарыгерлерди даярдоонун сапатын жогорулатуу, өлкөнүн 2030-жылга чейинки Улуттук өнүгүү программасынын алкагында спортту жана медицинаны айкалыштырып өнүктүрүү, санариптик шарттарда дене тарбия тармагы үчүн илимий-педагогикалык кадрларды даярдоо жана заманбап изилдөөлөрдү жүргүзүү сыяктуу маселелер талкууланды.
Тегерек столдун катышуучулары (эксперттер, мамлекеттик органдардын жана спорттук коомчулуктун өкүлдөрү) спортчулардын ден соолугун коргоо жана сапаттуу адистерди даярдоо үчүн күчтөрдү бириктирүү чечимине келишти.
Жыйынтыгында биргелешип иш алып баруу боюнча атайын резолюция кабыл алынды.
