Бишкек, 03.06.26 /Кабар/. Мектеп окуу китептерин санариптештирүү пландары тууралуу "Окуу китеби" басма үйүнүн директору Төлөгөн Аматов айтып берди.
Анын айтымында, учурда китептерге аудиокитептерди жана интерактивдүү элементтер камтылган QR-коддорду кошуу боюнча иштер жүрүп жатат.
"Келечекте басма үйү электрондук окуу китептерин жөн гана PDF форматында эмес, толугу менен интерактивдүү тесттерден өтүү мүмкүнчүлүгү бар 3D-форматында жасоону пландоодо. Азырынча базалык контентти даярдап алышыбыз керек, андан кийин аны санариптештире баштайбыз", - деди Аматов.
Ал иштин бир бөлүгү буга чейин эле ишке ашканын баса белгиледи.
"Жаңы окуу китептерине QR-коддор жайгаштырылган. Мисалы, англис тили окуу куралында окуучу QR-кодго телефонду багыттоо менен англис тилиндеги даяр диалогду уга алат", - деди Аматов.
