Бишкек, 14.10.25. /Кабар/. Жыл башындагы оор эпидемиологиялык кырдаалга карабастан, өлкөдө өзгөчө акыркы айларда кызамык оорусу туруктуу төмөндөп жатканы байкалууда. Бул тууралуу Республикалык иммунопрофилактика борбору (РИБ) маалымдайт.
Маалыматка ылайык, ооругандардын саны азайды. 2025-жылдын 9 айында өлкөдө кызамык оорусунун тастыкталган 8 949 учуру катталды, бул 2024-жылдын ушул мезгилине салыштырмалуу кыйла аз (13 380 учур).
Оорунун эң көп төмөндөшү 2025-жылдын сентябрында байкалды, бул 2024-жылдын ушул мезгилине салыштырмалуу 2-3 эсе аз болду. Октябрь айында кызамык оорусунун жаңы учурларынын жоктугу оң динамикадан кабар берет.
Оорулуулардын эмдөө статусу.
Ооругандардын басымдуу көпчүлүгү – 94 пайызы (8 390 учур) – эмделбегендер.
Алардын көпчүлүгү эмдөөдөн баш тарткандар (43% же 3 871 учур) жана жаш курагына байланыштуу эмдөө албагандар (31% же 2 746 учур, негизинен 1 жашка чыга элек балдар).
Бардык катталган учурлардын 75 пацызы 9 жашка чейинки курактагы балдарга туура келет. Оорунун эң жогорку көрсөткүчү (100 000 адамга 1 901,9) 1 жашка чыга элек балдардын арасында катталды.
Кызамык оорусунун чыгышына жооп катары Кыргызстандын бардык аймагында эмделбеген балдар арасында кошумча эмдөө иштери уланууда.
2025-жылдын май айында 9 айлык курактан 7 жашка чейинки балдардын арасында 2023-2025-жылдар аралыгында ишке ашырылган кызамыкка жана кызылчага каршы эмдөө өнөктөгүнөн кийин масштабга баа берилди. Баалоонун жыйынтыгы боюнча республика боюнча масштаб 94,5 пайызды түздү.
Кошумча эмдөөнүн алкагында 2 805 бала кызамыкка жана кызылчага каршы эмдөө алышты. Эмделбеген жана вакцинанын бардык дозаларын албаган балдарды аныктап, эмдөө боюнча жигердүү иштер улантылууда.
РИБ балдары пландалган эмдөөлөрдү өткөрүп жиберген бардык ата-энелерди эч кечиктирбестен жакынкы медициналык мекемеге кайрылууга чакырат.
