Бишкек, 01.07.26. /Кабар/. №100 кесиптик лицейинде "Күн панелдерин орнотуучу жана монтаждоочу" кесиби боюнча үч айлык кыска мөөнөттүү окуу программасын аяктаган окуучулар жыйынтыктоочу квалификациялык экзамен тапшырышты.
Агартуу министрлигинен билдиришкендей, экзамендин жүрүшүндө катышуучулар күн фотоэлектрдик панелдерин монтаждоо, электрдик туташтырууларды жүргүзүү, жабдууларды тестирлөө жана техникалык коопсуздук талаптарын сактоо боюнча теориялык билимдерин жана практикалык көндүмдөрүн көрсөтүштү.
Белгилей кетсек, окуу программасына энергетика тармагында, анын ичинде гидроэлектр станцияларында эмгектенип жаткан адистер да катышты. Бул кайра жаралуучу энергия булактары боюнча квалификацияны жогорулатууга болгон кызыгуу өсүп жатканын айгинелейт.
Күн энергетикасы өлкөнүн энергетикалык коопсуздугун чыңдоодо жана жашыл экономиканы өнүктүрүүдө артыкчылыктуу багыттардын бири болуп саналат. Буга байланыштуу лицей эмгек рыногунун талаптарына жооп берген адистерди даярдоону улантып, теориялык билимди практикалык окутуу менен айкалыштырган программаларды ишке ашырууда.
Белгилей кетсек, аталган долбоор ТИКАнын колдоосу менен ишке ашууда.
