Бишкек, 17.03.26 /Кабар/. Кыргызстанда бөйрөк жетишсиздиги менен жабыркаган бейтаптардын саны жылдан-жылга өсүүдө. Бул тууралуу Жогорку Кеңештин Социалдык саясат боюнча комитетинин жыйынында саламаттык сактоо министри Дамирбек Осмонов билдирди.
Анын айтымында, эгерде 2010-жылга чейин өлкөдө мындай бейтаптардын саны 2860 болсо, учурда алардын саны 4 478ге жетти.
Дүйнөлүк саламаттык сактоо уюмунун статистикасына ылайык, орто эсеп менен 1 млн калкка 830 бейтап туура келет. Салыштырмалуу алсак, бул көрсөткүч Казакстанда 800дү, Россияда 900дү түзсө, Кыргызстанда 1 млн кишиге 630 бейтап туура келүүдө.
Министр белгилегендей, оорунун өрчүшүнө кант диабети, пиелонефрит жана кан басымынын жогору болушу себеп болууда.
Бүгүнкү күндө республикада 54 гемодиализ борбору иштейт: анын 2си — мамлекеттик, 4ү — мамлекеттик-жеке өнөктөштүктүн алкагында жана 48и — жеке менчик.
Борборлордун аймактар боюнча бөлүштүрүлүшү:
- Бишкек шаарында – 11;
- Жалал-Абад облусунда – 8;
- Чүй, Ош жана Баткен облустарында – 6дан;
- Ысык-Көл облусунда – 5;
- Талас жана Нарын облустарында – 3төн.
Аталган мекемелерде 61 дарыгер жана 106 медициналык кызматкер эмгектенип жатат.
