Бишкек, 08.04.26. /Кабар/. Саламаттык сактоо министрлигине ЮНФПА тарабынан мизопростол дары каражаты берилди. Бул тууралуу аталган министрликтен билдиришти.
Ведомствонун маалыматына ылайык, гуманитардык жардамдын жалпы көлөмү 350 миң таңгакты (ар биринде 4 таблетка) түзөт. Анын жалпы суммасы 18,4 млн сом.
Мизопростол жашоо үчүн маанилүү дары каражаттарынын тизмесине кирет жана акушердик-гинекологиялык жардам көрсөтүүдө кеңири колдонулат. Дары каражаты өлкө аймагындагы 104 саламаттык сактоо уюмуна бөлүштүрүлүп, медициналык-социалдык тобокелдик тобуна кирген репродуктивдүү курактагы аялдарга акысыз берилет.
"Дары каражаты клиникалык протоколдордун алкагында колдонулат жана сапаттуу акушердик-гинекологиялык жардамдын жеткиликтүүлүгүн, айрыкча региондордо кеңейтүүгө мүмкүнчүлүк берет", — деп кошумчалады министрдин орун басары Бакытбек Кадыралиев.
