Бишкек, 05.06.26. /Кабар/. Министрлер кабинетинин төрагасынын биринчи орун басары Данияр Амангелдиев Санкт-Петербург Эл аралык экономикалык форумуна катышуунун алкагында Россиянын аймактарынын башчылары менен бир катар эки тараптуу жолугушууларды өткөрдү.
Ал алгач Калининград облусунун губернатору Алексей Беспрозванных менен жолугушту. Диалогдун жүрүшүндө тараптар агроөнөр жай комплекси, маданият, туризм жана өнөр жай тармактарында кызматташуунун кеңири спектрин талкуулашты.
Үстүбүдөгү жылдын 4-июлунда боло турган Калининград облусунун 80 жылдыгына арналган салтанатка катышууга чакыруу берилди. Жолугушуунун жыйынтыгында Кыргыз-Россия өнүктүрүү фонду менен Калининград облусун өнүктүрүү корпорациясынын ортосунда өз ара түшүнүшүү жана кызматташтык жөнүндө макулдашууга кол коюлду.
Андан соң Амангелдиев Вологда облусунун губернатору Георгий Филимонов менен жолугушту. Тараптар кызматташуунун келечектүү багыттарын талкуулап, соода-экономикалык жана маданий байланыштарды кеңейтүүнүн жолдорун белгилешти. Жолугушуунун жыйынтыгында Вологда облусунун өкмөтү менен министрлер кабинетинин ортосунда өз ара түшүнүшүү жөнүндө меморандумга кол коюлду.
Данияр Амангелдиев ошондой эле Саха Республикасынын (Якутия) башчысы Айсен Николаев менен жолугушту. Жемиштүү диалогдун жүрүшүндө тараптар соода-экономикалык, илимий-техникалык жана социалдык кызматташтыкты кеңейтүү маселелерин талкуулашты.
Жолугушуунун жыйынтыгында Кыргызстандын министрлер кабинети менен Саха Республикасынын өкмөтүнүн (Якутия) ортосундагы соода-экономикалык, илимий-техникалык жана социалдык кызматташуу жөнүндө макулдашууга кол коюлду.
