Бишкек, 03.12.25. /Кабар/. Бүгүн Юстиция министрлигинде Япониянын Юстиция министрлигинин делегациясы менен жолугушуу өттү.
Ведомстводон маалымдашкандай, Япония делегациясын Эл аралык департаменттин башчысы Такехико Кавабути баштап келди.
Тараптар мыйзамдарды өркүндөтүү, юридикалык кызматтарды санариптештирүү жана калкка укуктук жардам көрсөтүүнүн сапатын жогорулатуу боюнча тажрыйба алмашышты.
Япониянын делегациясы Япония жана Борбор Азия өлкөлөрүнүн юстиция министрлеринин деңгээлинде иш-чара уюштуруу мүмкүнчүлүгү, ошондой эле эл аралык жаштар форуму тууралуу маалымат берди.
Кыргыз тарап колдонуудагы кызматташуу жөнүндөгү меморандумдун маанилүүлүгүн белгиледи. Жапон тарап КР Юстиция министрлигинин бюрократиядан арылтуу, пробациялык системаны өнүктүрүү жана санариптештирүү багытындагы реформалары менен таанышты.
Жолугушуунун соңунда эки тараптуу жана көп тараптуу кызматташтыкты мындан ары тереңдетүүгө өз ара кызыкдар экендиктерин билдиришти.
