Бишкек, 19.02.26. /Кабар/. Агартуу министри Догдуркүл Кендирбаева илим, жогорку билим берүү жана инновация министринин биринчи орун басары Гүлнур Мамырова менен биргеликте Европа парламентинин Борбор Азия өлкөлөрү менен байланыш боюнча делегациясынын төрайымы Жузеппина Принчи баштаган депутаттары менен жолукту.
Министрликтен маалымдашкандай, жолугушууда тараптар билим берүү жана илим тармагындагы кызматташуунун келечегин, ошондой эле Erasmus+ программасын мындан ары өнүктүрүү маселелерин талкуулашты.
Догдуркүл Кендирбаева Европа парламентинин депутаттарына Кыргызстандын билим берүү системасын колдогону үчүн ыраазычылык билдирип, учурда Европа биримдигинин "Кыргызстандын билим берүү секторунда реформа жүргүзүү боюнча контракт" бюджеттик колдоо программасы ишке ашырылып жатканын белгиледи.
Белгиленгендей, Европа биримдигинин колдоосу Кыргызстандын билим берүү системасын комплекстүү модернизациялоого багытталган. Программага туруктуу каржылоо, билим берүү процесстерин санариптештирүү, инклюзивдүү чөйрөнү өнүктүрүү жана Twinning долбоорунун алкагында алдыңкы европалык тажрыйбаларды киргизүү кирет.
