Бишкек, 16.02.26. /Кабар/. Учурда “Кыргызфильм” киностудиясынын имаратында жана ага чектеш аймактагы чарбалык курулуштарда оңдоо-калыбына келтирүү иштери жүрүп жатат. Бул тууралуу Маданият, маалымат жана жаштар саясаты министрлигинен билдиришти.
Маалыматта белгиленгендей, реконструкциялоо иштеринин жүрүшү менен министр Мирбек Мамбеталиев жана анын орун басары Марат Тагаев таанышты.
Кинематография департаментинин директору Талантбек Толобеков жана “Кыргызфильм” киностудиясынын жетекчиси Максат Жумаев аткарылып жаткан иштерге токтолушту.
Учурда лифттер калыбына келтирилип, эмеректер сатып алынууда, режиссёр, продюсер, сүрөтчү жана гримёрлордун иш бөлмөлөрү оңдолууда.
Мындан тышкары, кинозалда жана кичи кинопавильондо (эски имаратта) иштер уланууда. Бул жерде оорукана, мектеп, түрмө, советтик типтеги батирлер жана башка сахналык мейкиндиктердин съёмкалык декорациялары түзүлүүдө.
Министр “Кыргызтасмасы” мекемесинин ишмердүүлүгүн да текшерди. Анда Мирбек Мамбеталиев Кинематография департаментинин жетекчилигине жана карамагындагы мекемелерге оңдоо иштерин өз мөөнөтүндө жана сапаттуу аяктоо, каражаттарды максаттуу пайдаланууга көзөмөлдү күчөтүүнү айтты. Ошондой эле ал тармактын инфраструктурасын модернизациялоо жана улуттук кино өндүрүшүн өнүктүрүү үчүн шарттарды жакшыртуу боюнча тапшырмаларды берди.
