Бишкек, 26.06.26. /Кабар/. Ысык-Көл облусундагы Кырчын жайлоосунда өткөрүлгөн рейд учурунда унаа менен жайыт жерлерин тебелеткен фактылар аныкталды.
Жаратылыш ресурстары, экология жана техникалык көзөмөл министрлигинен билдиришкендей, буга байланыштуу Укук бузуулар жөнүндө кодексине ылайык 6 жаранга протокол түзүлүп, жалпысынан 33 миң сом айып пул салынды.
"Учурда мындай рейддик иш-чаралар өлкөнүн бардык аймактарында өткөрүлүүдө", — деп айтылат маалыматта.
Белгиленгендей, жайыттарды мыйзамсыз тебелеп-тепсөө жана бузуу фактылары үчүн мыйзамга ылайык административдик жоопкерчилик каралган. Эреже бузгандарга 5 500 сомдон 20 миң сомго чейин айып пул салынышы мүмкүн.
