Бишкек, 24.02.26. /Кабар/. Кыргызстанда курч респиратордук вирустук инфекция (КРВИ) жана сасык тумоого байланыштуу эпидемиологиялык абал туруктуу. Бул тууралуу Саламаттык сактоо министрлигинен билдиришти.
Маалыматка ылайык, 16-февралдан 22-февралга чейин республика боюнча КРВИ жана сасык тумоонун 9 119 учуру катталды. Бул көрсөткүч өткөн жумага салыштырмалуу 13,7%га төмөндөгөн.
Бардык оорулуулардын 72%ын 14 жашка чейинки балдар (6 568 учур) түзөт. Оорулуулардын 11,8%ы (1 075 учур) ооруканага жаткырылган.
Министрлик сасык тумоо жана курч респиратордук инфекциялардан сактануу боюнча бир катар кеңештерди сунуштайт:
- Жөтөлгөндө жана чүчкүргөндө оозду жана мурунду салфетка же чыканактын ички бөлүгү менен жабуу;
- Организмди суукка же ашыкча ысыкка алдырбоо;
- Өзүңүздү начар сезсеңиз же сасык тумоонун белгилери байкалса — үйдө калуу;
- Колду дайыма жууп туруу, бөлмөлөрдү үзгүлтүксүз желдетүү жана нымдуу тазалоо жүргүзүү;
- Таза абада сейилдөө, жетиштүү уйку жана туура тамактануу;
- Таңкы гимнастика жасап, дене тарбия менен машыгуу;
- Бала ооруп калса — толук айыкканга чейин мектепке же бала бакчага жибербөө жана үй-бүлөлүк дарыгерге кайрылуу;
- Эл көп жерде беткап тагуу жана социалдык аралыкты сактоо.
КРВИ жана сасык тумоонун белгилери пайда болгондо өз алдынча дарыланбастан, катталган жер боюнча үй-бүлөлүк дарыгерге кайрылуу сунушталат.
