Бишкек, 28.09.26. /Кабар/. Монополияга каршы жөнгө салуу кызматы бүгүн, 28-сентябрга карата Кыргызстандагы күйүүчү майдын баасы тууралуу "Кабар" агенттигине маалымат берди.
Ага ылайык, бүгүнкү күндө нефтетрейдерлер күйүүчү майды белгиленген баада сатууда, ал эми күйүүчү майдын иш жүзүндөгү наркы менен белгиленген чекене баасынын ортосундагы айырма мамлекет тарабынан компенсацияланууда. АИ-92 бензини үчүн компенсация литрине 30,88 сомго чейин, ал эми дизелдик отун үчүн 42,27 сомго чейин түзөт.
Монополияга каршы жөнгө салуу кызматынан белгилешкендей, март айынан бери күйүүчү-майлоочу материалдардын баалары көтөрүлө баштаган. Негизги себеби, тышкы рыноктордо күйүүчү майдын баасынын жогорулашы болду, бул Кыргызстандагы сатуу баасына да таасирин тийгизди.
Дүйнөлүк баалардын өсүшүнүн ички рынокко тийгизген таасирин азайтуу үчүн Монополияга каршы жөнгө салуу кызматы бир катар чараларды сунуштаган. Аларга кампаларда күйүүчү майдын запасын топтоо, мунай соодагерлерин субсидиялар аркылуу колдоо жана керектөөчүлөр үчүн баалардын кескин жогорулашына жол бербөө үчүн салык жеңилдиктерин берүү кирген.
Кызматтын сунуштары министрлер кабинети тарабынан колдоого алынды. 2026-жылдын 25-майында министрлер кабинетинин токтому кабыл алынды. Бул токтомдо бир катар чараларды, анын ичинде субсидия механизмин жана акциздик салыкты төлөө мөөнөттөрүн кийинкиге калтыруу, рыноктун катышуучулары үчүн ийкемдүү шарттарды түзүү каралган. Субсидия механизми да күчүнө кирди жана социалдык жактан маанилүү товарларга кирген күйүүчү майлоочу материалдардын бааларын убактылуу мамлекеттик жөнгө салуу киргизилди.
"Бул механизмге ылайык, керектөөчүлөр дүйнөлүк баалардын толук өсүшүнө туш болушпайт: субсидияларсыз ички рынокто күйүүчү майдын баасы бир топ жогору болмок. Бул керектөөчүлөрдүн жана бизнестин чыгымдарынын өсүшүн токтотууга, товарлардын жана кызмат көрсөтүүлөрдүн баасына басымды азайтууга жана натыйжада экономикадагы инфляцияны токтотууга жардам берет. Ошентип, субсидия механизми жеке жарандар үчүн да, жалпы экономика үчүн да олуттуу оң таасирин тийгизет", - деп айтышты аталган кызматтан.
