Бишкек, 15.10.26. /Кабар/. Ишкер Алексей Губарев Кыргызстан жана Борбор Азиянын тарыхына, географиясына жана маданиятына байланыштуу 17 аталыштагы сейрек китепти Мамлекеттик китеп палатасына белекке берди.
Маданият, маалымат жана жаштар саясаты министрлигинен билдиришкендей, алардын арасында Түркстан, Кокон хандыгы жана Кыргызстандын тарыхый-маданий өткөнүнө арналган эмгектер бар. Өзгөчө баалуу басылмалардын катарында 1886-жылы жарык көргөн В. Наливкиндин "Краткая история Кокандского ханства" аттуу эмгеги, В. П. Семёнов-Тян-Шанскийдин редакциясы астында чыккан "Полное географическое описание нашего Отечества" жыйнагынын "Киргизский край" (1903) жана "Туркестанский край" (1913) томдору орун алган.
Ошондой эле археолог А. Бернштамдын 1941 жана 1943-жылдары жарык көргөн, аз нускада басылып, сейрек сакталып калган илимий эмгектери да тапшырылды.
Мамлекеттик китеп палатасынын директору Жылдыз Бакашованын айтымында, белекке берилген айрым басылмалар республиканын китеп фонддорунда мурда болгон эмес. Бул эмгектер Кыргызстандын тарыхын жана маданиятын изилдеген окумуштуулар, студенттер жана басма тармагынын өкүлдөрү үчүн маанилүү булак болуп саналат.
Анын айтымында, айрым басылмалар мурда республиканын китеп фонддорунда болгон эмес. Алар тарыхчылар, изилдөөчүлөр жана студенттер үчүн маанилүү булак болуп саналат.
Белекке берилген китептер мамлекеттик эсепке алынып, Мамлекеттик китеп палатасынын фондуна сактоого өткөрүлөт.
