Бишкек, 14.11.25 /Кабар/. Казакстан суюлтулган мунай газын, пропан жана бутанды экспорттоого болгон тыюуну дагы 6 айга узартты. Бул тууралуу Казинформ агенттиги билдирди.
Маалыматка ылайык, тиешелүү токтомго энергетика министри кол койгон.
Документке ылайык, автоунаа жана темир жол аркылуу суюлтулган газды өлкө сыртына чыгарууга 2025-жылдын 14-ноябрынан тартып расмий түрдө тыюу салынат.
Бирок, төмөнкү айрым учурлар өзгөчө шарт катары калтырылат:
- Президент тарабынан бекитилген продукцияны бөлүштүрүү келишимине же жер казынасын пайдалануу келишимине ылайык иш алып барган, туруктуу салык режимин колдонгон жер казынасын пайдаланган компаниялардын экспорту;
- “Карачаганак” кенинен алынган, казакстандык чийки заттан өндүрүлгөн товарлардын эл аралык келишимдерге ылайык экспорту;
- Казакстан аймагынан башталып, кайра токтотулган транзиттик жүк ташуулар;
- Өкмөт чечими менен гуманитардык жардам катары жөнөтүлгөн товарлар.
Эске салсак, буга чейин суюлтулган газды экспорттоого тыюу 2025-жылдын 14-майынан тартып 6 айга киргизилген болчу.
