Бишкек, 11.02.25. /Кабар/. Кара-Суу районунда эхинококкоз оорусун алдын алуу максатында "Медициналык дарыгер адамды дарылайт, ветеринардык дарыгер - адамзатты дарылайт" аталышындагы форум өттү.
Суу ресурстары, айыл чарба жана кайра иштетүү өнөр жайы министрлигинен билдиришкендей, иш-чараны Кара-Суу райондук мамлекеттик администрациясы райондук ветеринардык башкармалык менен биргеликте уюштурду.
Иш-чарага райондук мекеме-ишканалардын жетекчилери, айыл өкмөт башчылары, айыл башчылар жана башка тиешелүү тараптар катышты.
Иш-чаранын максаты райондун аймагында эпидемиологиялык жана эпизоотиялык абалды жакшыртуу болуп саналат.
Форумда төмөндөгүдөй маселелер талкууланды:
- эхинококкозго каршы күрөшүүнүн улуттук артыкчылыктары жана келечеги;
- эхинококкозго каршы күрөшүүдө илимий жана практикалык чечимдер;
- өлкөдөгү эхинококкоз оорусунун абалы;
- элдин саламаттыгын эхинококкоз оорусунан сактоо жана коргоо;
- эхинококкоз боюнча эпидемиологиялык жана эпизоотиялык абалды жакшыртуу;
- адамдардын жана жаныбарлардын эхинококкоз оорусуна мониторинг жүргүзүү;
- эхинококкоз оорусу тууралуу маалымат (маалыматтык системалар);
- климаттын өзгөрүү шарттарына ылайык ооруну изилдөө;
- эхинококкоз менен күрөшүү жана алдын алуу чаралары.
