Бишкек, 22.06.26. /Кабар/. Кара-Суу райондук Үй-бүлөлүк медицина борбору (ҮМБ) материалдык-техникалык базасын жана кадрдык потенциалын чыңдоону ийгиликтүү улантууда. Бул тууралуу мекеменин директору Рустам Козубаев билдиргенин Саламаттык сактоо министрлиги кабарлады.
Анын айтымында, бүгүнкү күндө борбор өлкөдөгү эң ири райондордун бири болгон Кара-Суунун 400 миңден ашуун калкына жеткиликтүү жана сапаттуу медициналык жардам көрсөтүп келет. Борбордун түзүмүнө 25 үй-бүлөлүк дарыгерлер тобу жана 65 фельдшердик-акушердик пункт (ФАП) кирет. Мекемеде жалпысынан 1100гө жакын медициналык кызматкер эмгектенет.
"Айлык акынын жогорулашы кадрдык кырдаалды кыйла жакшыртты. Учурда орто медициналык кызматкерлер менен камсыздоо маселеси толук чечилди. Биз эми райондун айрым алыскы калктуу конуштарына дарыгерлерди тартуу боюнча иштерди улантып жатабыз", - деди Козубаев.
Эске салсак, үстүбүздөгү жылдын апрель айында президенттин катышуусунда борбордун жаңы, заманбап имараты пайдаланууга берилген. Учурда мекеме компьютердик томограф, фиброскан, эндоскопиялык жабдуулар жана УДИ сыяктуу заманбап диагностикалык аппараттар менен камсыздалган.
Өзгөчө белгилей кетсек, калк үчүн жогорку технологиялуу кызматтардын жеткиликтүүлүгүн арттыруу максатында, борбордо компьютердик томографиянын (КТ) баасы бекитилген тарифке ылайык 678 сомду түзөт.
Кара-Суу райондук ҮМБ мындан ары да ооруларды эрте аныктоо жана көрсөтүлгөн медициналык жардамдын сапатын жогорулатуу багытында иш алып бармакчы.
