Бишкек, 04.04.25. /Кабар/. Канаданын премьер-министри Марк Карни күн мурун АКШнын аракеттерине жооп катары Канада CUSMA келишиминде каралбаган бардык АКШдан импорттолуучу унааларга 25 пайыздык тариф киргизерин билдирди.
Премьер-министрдин айтымында, бул чаралар Мексикага терс таасирин тийгизбейт.
“Дүйнөлүк экономика бүгүн кечээкиден түп-тамыры менен өзгөрөт. АКШ администрациясынын буга чейинки аракеттери Канадага түздөн-түз каршы чыкпаганы менен дүйнөлүк экономиканы кыйратып, анын өсүшүнө терс таасирин тийгизет.
Биздин АКШ менен тынымсыз тереңдеп бара жаткан интеграцияга негизделген мурунку мамилебиз аяктады. АКШнын глобалдык экономикалык лидерлигинин 80 жылдык мезгили аяктады", - деди ал.
Эске салсак, буга чейин АКШ администрациясы өлкөдөн тышкары чыгарылган бардык унааларга 25% импорттук бажы төлөмүн киргизген.
“Биз 25% тарифти сөзсүз түрдө алабыз. Бирок унааларды АКШда чогултсаңар, тарифтер болбойт”, - деген АКШнын президенти Дональд Трамп.
