Бишкек, 03.12.25. /Кабар/. Кыргызстандын камсыздандырылган жарандары үчүн жеңилдетилген дары-дармек каражаттарынын маалымдамасы жаңыланды. Бул тууралуу Милдеттүү камсыздандыруу фондунан билдиришти.
Жеңилдетилген дары-дармек каражаттарынын жаңыланган маалымдамасы 1-декабрдан тартып күчүнө кирди.
Маалымдамада амбулаториялык деңгээлде дарыкана тармагы аркылуу жеңилдетилген программалар боюнча орду толтурулуучу дары-дармек каражаттарынын компенсациясынын өлчөмдөрү жаңыртылган.
Эксперттик топтун ишинин жыйынтыгы боюнча, маалымдамага 7 аталыштагы эл аралык патенттелбеген дары-дармек каражаттары тандалып алынган жана киргизилген. Анын ичинде:
- антитиреоиддик каражат;
- жүрөк-кан тамыр ооруларын дарылоо үчүн препараттар;
- диуретикалык каражаттар;
- транквилизатор;
- медикаментоздук аборт үчүн каражаттар бар.
Кошумча пакет боюнча дары-дармектерди ММК фонду менен иштеген дарыканалардан электрондук рецепт боюнча 50 пайызга чейин арзандатуу менен сатып алууга болот. Бул үчүн үй-бүлөлүк дарыгерге кайрылуу керек, ал консультациядан кийин көрсөтмөсү болгон учурда электрондук рецепт жазып берет.
Жаңыланган маалымдама менен кеңенирээк таанышсаңыз болот: https://foms.kg/spavochniki/
