Бишкек, 27.10.25 /Кабар/. Камерундун азыркы президенти Пол Бия 92 жашында шайлоочулардын 53,7% добушун алып, жеңишке жетти. Бул тууралуу Синьхуа агенттиги жазды.
Маалыматка караганда, 1982-жылдан бери бийликте турган Бия дүйнөдөгү бийликте эң узак турган мамлекет башчысы. Ал сегизинчи жолу катары менен бийликте отурат.
Биянын негизги атаандашы мурдагы министр Исса Чирома Бакари болду, ал 2025-жылдын июнь айында кызматтан кеткен. Ал 35,2% добуш алган. Кайрадан шайланган президенттин 6-ноябрда баш калаа Яундеде инаугурациясы болот. "Конституциялык кеңеш добуш берүүнүн жыйынтыктарын расмий түрдө ырастайт. Пол Бия Камерун Республикасынын президенти болуп кайра шайланды", - деп жарыялаган Конституциялык кеңештин башчысы Клемент Атангана.
Бия 1933-жылы 13-февралда Мвомеке айылында туулган. 92 жашында Бия Камерунду 43 жыл бою үзгүлтүксүз жетектеп келет. Камерундун биринчи президенти Амаду Ахиджо ден соолугуна байланыштуу 1982-жылы 4-ноябрда кызматтан кеткен. Бия ошол кезде премьер-министр болгон, ошондуктан ал автоматтык түрдө бул кызматка киришкен. Ал 1984-жылдын январында кайра шайланган.
2008-жылы ал президенттик мөөнөткө чектөөлөрдү алып салып, ага белгисиз мөөнөткө талапкерлигин коюуга мүмкүнчүлүк берген.
Ал 2018-жылдагы акыркы шайлоодо оппозициянын көптөгөн мыйзам бузуулар боюнча дооматтарына карабастан, 71,28% добушка ээ болгон. Бия ошентип жети жолу мамлекет башчысы болуп кайра шайланды. Биянын сегизинчи мөөнөткө талапкерлигин коюу пландары ушул жылдын июль айында жарыяланган.
Белгилей кетсек, Биядан кийин дүйнөдөгү эң кары президент болуп Палестинанын президенти Махмуд Аббас турат, ал 89 жашта. Ошол эле учурда дүйнөдөгү эң кары президент 96 жаштагы Малавиден келген Хастингс Камузу Банда болуп эсептелет. Ал 1966-1994-жылдары президент болуп иштеген.
