Бишкек, 03.08.26. /Кабар/. Кадамжай районунда Кытайдын Jinhua City Xignong Steel Structure Engineering Co., Ltd. компаниясынын өкүлдөрүнүн катышуусунда жергиликтүү ишкерлер, дыйкан-фермерлер жана башка кызыкдар тараптар менен ишкердик жолугушуу өттү.
Суу ресурстары, айыл чарба жана кайра иштетүү өнөр жайы министрлигинен билдиришкендей, жолугушууда компания өкүлдөрү өнөр жай жана коммерциялык багыттагы ири өндүрүштүк кубаттуулуктарды түзүү боюнча долбоорлорун тааныштырышты. Алар заманбап логистикалык борборлорду, күнөскана комплекстерин жана башка өндүрүштүк-инфраструктуралык объектилерди куруу мүмкүнчүлүктөрү тууралуу маалымат беришти.
Тараптар инвестицияларды тартуу, биргелешкен долбоорлорду ишке ашыруу, айыл чарба продукциясын кайра иштетүү, жаңы жумуш орундарын түзүү жана узак мөөнөттүү өз ара пайдалуу кызматташтыкты өнүктүрүү маселелерин талкуулашты.
