Бишкек, 17.07.26 /Кабар/. Талас облусунун Айтматов районунун Шекер айылында салынып жаткан "Чыңгыз Ааламы" маданий-мемориалдык комплексинин курулуш иштери 70 пайызга аткарылды. Бул тууралуу Курулуш, архитектура жана турак жай-коммуналдык чарба министрлиги билдирди.
Маалыматка ылайык, курулуш министринин орун басары Талантбек Иманакун уулу жана президенттин Талас облусундагы ыйгарым укуктуу өкүлү Эрмат Жуматаев комплекстин курулуш жүрүшүн текшеришти.
Анда аталган иштер белгиленген графикке ылайык жүргүзүлүп жатканы, учурда объекттин жалпы даярдыгы 70 пайызды түзөрү белгиленди.
Долбоор президенттинин тапшырмасынын негизинде ишке ашырылып, комплексте залкар жазуучу Чыңгыз Айтматовдун үй-музейи, китепкана, кинотеатр, мейманкана жана башка инфраструктуралык объектилер курулат.
Курулуш иштери министрликке караштуу "Кыргызкурулуш" мамлекеттик ишканасы тарабынан башталган. Долбоор республикалык бюджеттин эсебинен каржыланууда.
Маданий-мемориалдык комплексти эгемендүүлүктүн 35 жылдыгына карата пайдаланууга берүү пландалууда.
