Бишкек, 30.11.25 /Кабар/. Индонезиянын Суматра аймагынын үч провинциясында катуу сел жана жер көчкүдөн 303 адам каза болуп, 279 адам дайынсыз жоголду. Бул тууралуу Казфинформ агенттиги жазды.
Индонезиянын Улуттук кырсыктарды башкаруу агенттигинин башчысы Сухарянто билдиргендей, эң көп жоготуу Түндүк Суматра провинциясында катталган. Аталган аймакта 166 адам каза болуп, 143 адам дайынсыз жоголгон.
Батыш Суматрада 90 адамдын каза болгону жана 85 адамдын дайыны чыкпай жатканы маалымдалды. Ал эми Ачех провинциясында 47 адам көз жумуп, 51 адам дайынсыз жоголгон.
Куткаруу иштерине жергиликтүү өзгөчө кырдаалдар кызматы, аскерлер жана ыктыярчылар тартылып, издөө-куткаруу аракеттери улантылып жатат.
Адистердин айтымында, катуу жаан-чачын дагы бир нече күнгө улануусу мүмкүн.
