Бишкек, 21.01.26. /Кабар/. Ош облустук филармониясынын "Аалам" фольклордук тобу жана "Адеми" бий ансамбли 13-24-январда Индияда өтүп жаткан XI эл аралык "Рамаяна" фестивалына катышууда.
Маданият, маалымат жана жаштар саясаты министрлигинен билдиришкендей, Кыргызстандын атынан катышып жаткан чыгармачыл жамааттар өлкөнүн маданий элчилери катары өнөр көрсөтүшүүдө.
Фестивалдын алкагында кыргыз элинин бай тарыхын жана руханий дүйнөсүн чагылдырган улуттук кийимдер, байыркы музыкалык аспаптар, ошондой эле ата-бабалардан мурас болуп келген улуу "Манас" эпосунун негизиндеги көркөм программа сунушталып, дүйнө коомчулугунун кызыгуусун жана жогорку баасын алууда.
Маалымат үчүн: 2025-жылдын октябрь айында Т. Тыныбеков атындагы Жалал-Абад облустук филармониясынын "Мөлмөл" эл аспаптар оркестри Индияда өткөн элдик фольклордук аспаптардын IX эл аралык "Рамаяна" фестивалына катышып, жогорку деңгээлдеги өнөрү менен өзгөчөлөнүп, ийгиликтүү жыйынтыктар менен кайтып келген.
