Бишкек, 27.11.25. /Кабар/. Гонконгдогу көп кабаттуу үйдөн өрт чыгып, каза болгондордун саны 44гө жетти, деп CNN билдиргенин Интерфакс жазды.
Маалыматка караганда, имараттагы дагы 279 тургун менен байланыш боло элек. Тилсиз жоодон кийин 29 адам ооруканага жаткырылган. Алардын кеминде жетисинин абалы оор.
Окуя болгон жерден 700гө жакын адам эвакуацияланган.
Көп кабаттуу үйдө 2 миңге жакын батир бар экени жана болжол менен 4800 тургун жашай турганы айтылган.
Өрттүн себеби иликтенүүдө. Алдын ала маалыматтар боюнча, өрт имараттардын биринин сыртында жайгашкан бамбуктан жасалган каркас жана курулуш торлорунан тутанган. Өрт тез жайылып, көп өтпөй имараттарды каптаган.
