Бишкек, 10.09.25. /Кабар/. Франциянын жаңы премьер-министри Себастьян Лекорнюга ыйгарым укуктарды өткөрүп берүү аземи Парижде болуп өттү. Бул тууралуу РИА Новости кабарлап, француз өкмөтү аземди X социалдык тармагында түз көрсөттү.
Кечээ, Франциянын президенти Эммануэль Макрон коргоо министри болуп иштеп келген Лекорнюну жаңы премьер-министр кылып дайындаган. Бул чечим мурдагы өкмөт башчы Франсуа Байруга парламент ишеним көрсөтпөгөндөн кийин кабыл алынган.
Москва убактысы боюнча болжол менен саат 13:00дө Лекорню премьер-министрдин расмий резиденциясы болгон Матиньон сарайына келген. Аны сырттан Франсуа Байру тосуп алган. Андан соң экөө сүйлөшүү үчүн имаратка киришкен. Жолугушуудан кийин эки саясатчы резиденциянын короосунда кыскача билдирүү жасап, бири-бири менен кол алышты.
Себастьян Лекорню Байруга колдоосу үчүн ыраазычылык билдирип, бүгүнтөн тарта ар кандай саясий күчтөр менен кеңешүүлөрдү баштай турганын айткан. Эми ал жаңы өкмөттү түзүшү керек. Ошондой эле жакын арада кайрылуу жасай турганын белгилеген.
