Бишкек, 14.10.26. /Кабар/. Францияда мектеп окуучулары билим берүү тармагына кошумча каражат бөлүүнү талап кылып, нааразылык акцияларын улантууда. Бул — окуучулардын нааразылык акцияларынын бешинчи толкуну экенин Казинформ кабарлайт.
Маалыматка ылайык, студенттик кесиптик бирликтер буга чейин жаштарды кезектеги иш таштоого катышууга чакырышкан. Алардын айтымында, өкмөт окуучулардын талаптарына көңүл бурбай келет.
Франциянын билим берүү министри Эдуард Жеффрейдин маалыматы боюнча, 13-октябрда өлкөдө 200 мектептин иши бөгөттөлгөн. Бул нааразылык акциялары башталган алгачкы күндөргө салыштырмалуу кыйла аз. Ал эми мугалимдердин кесиптик бирлиги университеттердин 90%ы жабылганын же алардын ишине тоскоолдук жаралганын билдирген.
Нааразылык акцияларына швециялык климат активисти Грета Тунберг да катышты. Ал Сен-Дени шаарындагы Поль-Элюар орто мектебинин жанында болуп, окуучулардын талаптарын колдоду. Ошондой эле жаштарга карата полициянын аракеттерин сынга алды.
Страсбург шаарында болсо студенттер менен полициянын ортосунда кагылышуу болду. Студенттер шаардын борборуна өтүүгө аракет кылышканда, полиция алардын жолун тосуп, көздөн жаш агызуучу газ колдонду.
Буга чейин Франциядагы нааразылык акцияларынан улам жүздөгөн мектептердин иши үзгүлтүккө учураган. Алгач Иль-де-Франс аймагында башталган акциялар кийин өлкөнүн башка аймактарына да жайылган.
Нааразылык акциялары учурунда 400дөн ашык адам кармалган. Алардын көпчүлүгү жашы жете электер. Акциялар кеминде 400 мектепти камтыган.
Окуучулардын нааразылык акцияларынан Францияга келтирилген чыгым 30 миллион евро деп бааланууда.
