Бишкек, 16.01.26. /Кабар/. Бишкектеги фастфуд түйүндөрүнүн биринде 15-январда 17 адам ууланган, алардын ичинен төртөө — балдар. Буга байланыштуу Саламаттык сактоо министрлигинин Оорулардын алдын алуу жана мамлекеттик санитардык-эпидемиологиялык көзөмөл департаментинин кызматкерлери жарандарга тамак-аштан уулануунун алдын алуу чараларын эскертишти.
Тамак-аштан уулануу — бул оору козгоочу микроорганизмдер же токсиндер менен өтө булганган же микробдук эмес мүнөздөгү уулуу заттарды камтыган тамак-ашты колдонуунун натыйжасында келип чыккан курч оору.
Алдын алуу чаралары
Фастфуд ишканалары үчүн:
- тамак даярдоодо санитардык ченемдерди, эрежелерди жана технологиялык нускамаларды так сактоо;
- өндүрүштүк көзөмөлдөө программаларынын болушу жана аларды аткаруу;
- кызматкерлерди медициналык кароодон өткөндөн кийин гана жумушка киргизүү;
- жугуштуу оорулардын белгилери бар адамдарды жумушка жолотпоо;
- кызматкерлерди жеке гигиена жана санитардык эрежелерге үзгүлтүксүз окутуу;
- сапаты жана коопсуздугу тастыкталган документтери бар, келип чыгышы белгилүү чийки заттарды гана колдонуу;
- чийки заттарды жана даяр тамактарды өзүнчө сактоо;
- тамак-аш азыктарын сактоо жана бышыруу учурундагы температуралык режимдерди сактоо;
- этти жана жарым фабрикаттарды жетиштүү термикалык иштетүүдөн (бышыруудан) өткөрүү;
- имараттарды, жабдууларды жана инвентарларды үзгүлтүксүз тазалоо жана дезинфекциялоо;
- чийки жана даяр продукциялар үчүн өзүнчө инвентарларды колдонуу;
- үзгүлтүксүз суу менен камсыздоо жана кол жуу үчүн шарттарды түзүү;
- сатылып жаткан продукциянын коопсуздугу үчүн кожоюндун жеке жоопкерчилиги.
Калк үчүн:
- сырткы көрүнүшү таза жана санитардык шарттары сакталган коомдук тамактануу жайларына артыкчылык берүү;
- күмөн жараткан, туруктуу эмес (көчмө) түйүндөрдөн шаурма жана башка тамактарды сатып алуудан оолак болуу;
- тамактанар алдында, өзгөчө үйдөн тышкары жерде тамактанганда колду жуу;
- фастфудду балдарга, кош бойлуу аялдарга, кары-картаңдарга жана өнөкөт оорусу бар адамдарга сунуштабоо;
- уулануунун алгачкы белгилери пайда болгондо өз алдынча дарыланбай, тез арада медициналык жардамга кайрылуу.
