Бишкек, 18.06.26. /Кабар/. Министрлер кабинетинин төрагасынын орун басары Эрлист Акунбеков Нарын облусунда Куланак ГЭСинин курулуш иштеринин жүрүшү менен таанышты.
Куланак ГЭСи Нарын районунда “Нарын” өндүрүштүк ишканасы тарабынан ишке ашырылып жаткан ири энергетикалык долбоор болуп саналат. Долбоордун кубаттуулугу 100 МВтты түзүп, жылына 435,2 млн кВт-саат электр энергиясын өндүрүүгө мүмкүнчүлүк берет.
Учурда объектте дамбанын, ГЭС имаратынын жана узундугу 6,5 чакырымды түзгөн суу жеткирүүчү каналдын курулушу активдүү жүргүзүлүүдө. Курулуш аянтында 600гө жакын адам эмгектенүүдө, алдыңкы күндөрү алардын саны 1200гө чейин жетет.
Акунбеков жооптуу тараптарга курулуш иштерин белгиленген мөөнөттө жана сапаттуу бүткөрүүнү камсыздоону тапшырды.
Белгиленгендей, объект 2027-жылы пайдаланууга берилет. Долбоор толук ишке киргенден кийин өлкөдөгү электр энергиясынын тартыштыгын кыскартууга олуттуу салым кошуп, жылына 435,2 млн-кВт саат электр энергиясын өндүрөт.
