Бишкек, 21.07.26. /Кабар/. Мамлекеттик бажы кызматынын төрагасы Алмаз Салиев Кытай менен чек арада жайгашкан стратегиялык маанилүү "Эркечтам" өткөрүү пунктунун курулуш жана модернизациялоо иштеринин жүрүшү менен таанышты.
Бажы кызматынан билдиришкендей, учурда өткөрүү пунктунда инфраструктураны толугу менен жаңылоо боюнча масштабдуу долбоор ишке ашырылууда.
Долбоор аяктагандан кийин өткөрүү пунктунун кубаттуулугу бир багытта күнүнө 1000 транспорт каражатына чейин жетет.
Ошондой эле өткөрүү пунктунун аянты 8 гектарга чейин кеңейтилип, кирүү үчүн 6 жана чыгуу үчүн 4 заманбап унаа тилкеси уюштурулат. Мындан тышкары, саатына 120 унааны текшерүүгө жөндөмдүү инспекциялык-текшерип кароо комплекси, кошумча аянтчалар жана жол инфраструктурасы курулууда.
Иш сапардын жыйынтыгында Мамлекеттик бажы кызматынын төрагасы курулуш иштерин тездетип, жаңыланган "Эркечтам" өткөрүү пунктун мүмкүн болушунча эртерек пайдаланууга берүү боюнча жооптуу мекемелерге тиешелүү тапшырмаларды берди.
