Бишкек, 13.10.26. /Кабар/. 2026-жылдын сентябрь айында Дүйнөлүк океандын бетиндеги суунун орточо температурасы 21,05 градус Цельсийге жетип, ушул ай үчүн жаңы рекорд катталды. Бул тууралуу БелТА билдирди.
Анда белгиленгендей, тиешелүү маалыматтарды Европанын Copernicus климаттык мониторинг кызматы жарыялаган.
Буга чейинки сентябрь айындагы рекорд 2023-жылы катталып, анда океан бетиндеги суунун орточо температурасы 20,92 градусту түзгөн.
Метеорологдор температуранын рекорддук деңгээлге жетишин 2026-жылы күч алган Эль-Ниньо климаттык кубулушу менен байланыштырышууда. Синоптиктер бул кубулуш байкоолор башталгандан берки эң күчтүү көрүнүштөрдүн бири болушу мүмкүн экенин бир нече айдан бери эскертип келишет.
Copernicus кызматынын баамында, Эль-Ниньо азырынча эң жогорку чегине жете элек болсо да, сентябрдагы көрсөткүчтөр анын өзгөчө күчтүү экенин көрсөтүп турат.
Эль-Ниньо — Тынч океандын экватордук бөлүгүндөгү жер үстүндөгү суулардын температурасынын жогорулашы менен байланышкан климаттык кубулуш. Ал дүйнөнүн ар кайсы аймактарындагы аба ырайына таасир этип, кургакчылык жана суу ташкыны коркунучун күчөтүшү мүмкүн. Ошондой эле адамдын ишмердүүлүгүнөн улам күчөп жаткан глобалдык жылуулуктун таасирин арттырышы ыктымал.
Буга чейин Эль-Ниньо күчөй берери жана 2026-жылдын декабрь айында эң жогорку чегине жетиши мүмкүн экени кабарланган.
