Бишкек, 15.06.26. /Кабар/. Айтматов районунун Аманбаев айылында жашылча-жемиштерди сактоочу жана кайра иштетүүчү "Талас Органик" ЖЧКсынын заводунун курулушуна капсула салынды. Бул тууралуу президенттин Талас облусундагы өкүлү Эрмат Жумаев социалдык тармактагы баракчасына жазды.
Анын маалыматына караганда, долбоордун алкагында 300 гектар айдоо жер өздөштүрүлүп, анын 40 гектарына картошка эгилди. Тамчылатып сугаруу системасы курулуп, 100 метрлик скважина казылган, ошондой эле көлөмү 10 миң куб метр болгон суу сактоочу жай пайдаланууга берилди.
"Мындан тышкары, 20 гектар аянтка заманбап муздаткыч кампалар жана жашылча-жемиштерди кайра иштетүүчү өндүрүш комплекси курулууда. Долбоордун жалпы наркы 320 млн сомду түзөт. "Альянс Алтын" өнүктүрүү фондунун колдоосу менен бүгүнкү күнгө чейин 200 млн сом каражат бөлүнүп, ал айыл чарба техникаларын, заманбап жабдууларды сатып алууга, бассейндерди курууга жана тамчылатып сугаруу системасын орнотууга жумшалууда", - деди Жумаев.
Өкүл белгилегендей, бул долбоор жүздөгөн жаңы жумуш орундарын түзүп, Талас облусунун айыл чарба тармагын өнүктүрүүгө, фермерлердин мүмкүнчүлүгүн кеңейтүүгө жана экспорттук потенциалын жогорулатууга чоң салым кошот.
Завод ушул жылдын 31-август - Эгемендүүлүк күнүнө карата пайдаланууга берилет.
