Бишкек, 13.03.25. /Кабар/. Кыргыз-тажик чек арасындагы эки өткөрмө бекеттин иши жанданып, төрт жылдан бери көрүшпөгөн кыргыз-тажик чек арасындагы туугандардын көрүшүүсүнө шарт түзүлдү.
Президенттин Баткен облусундагы өкүлчүлүгүнөн билдиришкендей, бүгүн Кыргызстан жана Тажикстан президенттери Садыр Жапаров менен Эмомали Рахмондун видео байланыш аркылуу катышуусунда кыргыз-тажик мамлекеттик чек арасында жайгашкан "Кайрагач" жана "Кызыл-Бел" көзөмөл-өткөрмө пункттары кайра ачылды.
Жеринен иш-чарага президенттин Баткен облусундагы ыйгарым укуктуу өкүлү Айбек Шаменов жана Тажикстандын Согди облусунун төрагасы Раджаббой Ахмадзода катышты.
Мамлекет башчылардын буйругунан кийин эки өлкөнүн тең шлагбаумдары көтөрүлдү.
Бул күнү туугандарын күтүп чек арага келген, төрт жылдан бери көрүшпөгөн кыргыз-тажик чек арасындагы туугандардын көрүшүүсүнө шарт түзүлдү. Ошондой эле бекеттен эки тарапка автоунаалар өттү.
Белгилей кетсек, "Кайрагач" жана "Кызыл-Бел" көзөмөл-өткөрүү пункттарынын ишин жандандыруу Кыргызстан менен Тажикстандын ортосундагы эки тараптуу мамилелерди чыңдоодогу маанилүү кадам болуп саналат жана эки өлкөнүн элдеринин ортосундагы соода, экономикалык кызматташтык жана достук байланыштарды өнүктүрүүгө өбөлгө түзөт. Иш-чара Тажикстандын президенти Эмомали Рахмондун Кыргызстанга жасаган мамлекеттик сапарынын алкагында өткөрүлдү.
