Бишкек, 31.07.26. /Кабар/. Кыргызстандын Эгемендүүлүгүнүн 35 жылдыгына арналган төкмө акындардын республикалык айтышынын тандоо туру 10-августта Бишкектеги Кыргыз улуттук "Манас" театрында өтөт.
Маданият, маалымат жана жаштар саясаты министрлигинен билдиришкендей, иш-чаранын максаты – эгемендүүлүктү, улуттук баалуулуктарды даңазалоо, төкмөлүк өнөрдү сактоо жана өнүктүрүү, жаштарды мекенчилдикке тарбиялоо.
Тандоо турунда акындар чүчү кулак аркылуу жупташып, алым сабак айтышат. Ар бир жупка 4-5 мүнөттөн убакыт берилип, калыстар тобунун чечими менен мыкты көрсөткүч көрсөткөн 8 акын республикалык айтыштын негизги этабына өтөт.
Катышуучулар төкмөлүк чеберчилиги, сөз байлыгы, көркөм ой жүгүртүүсү, комуз чертүү өнөрү жана сахна маданияты боюнча бааланат.
Республикалык айтыштын негизги этабы 11-12-сентябрда Талас облусунда өткөрүлөт.
Иш-чара Маданият министрлиги, Кыргыз улуттук "Манас" театры жана "Айтыш" коомдук фонду тарабынан уюштурулууда.
