Бишкек, 13.07.26. /Кабар/. Талас облусунда өлкө Эгемендүүлүгүнүн 35 жылдык мааракесин жогорку деңгээлде уюштуруу жана салтанаттуу белгилөө маселеси талкууланды. Бул тууралуу президенттин Талас облусундагы өкүлчүлүгүнөн билдиришти.
Маалыматка ылайык, президенттин өкүлү Эрмат Жумаев аппараттык жыйын өткөрүп, анда майрамга карата аймактагы даярдык иштерин күчөтүү боюнча тиешелүү органдарга бир катар тапшырмаларды берди.
Жыйындын алкагында укук коргоо органдарынын, жергиликтүү өз алдынча башкаруу органдарынын жана облустук ишканалардын жетекчилеринин катышуусунда атайын штаб түзүү тапшырмасы коюлду. Бул түзүм Эгемендүүлүк майрамын уюшкандыкта өткөрүү иштерин түз координациялайт.
Ошондой эле облус аймагында курулуп жаткан өнөр жай ишканаларынын, социалдык объектилердин жана маданий комплекстердин курулуш сапатына жана белгиленген мөөнөттө бүткөрүлүшүнө өзгөчө көңүл бурулат.
Жыйындын соңунда Эрмат Жумаев буга чейин өткөн элдик жыйындарда жарандар тарабынан көтөрүлгөн көйгөйлөрдүн аткарылышын көзөмөлдөөнү күчөтүүнү жана элдин маселелерин өз убагында чечүүнү тиешелүү жетекчилерден талап кылды.
