Бишкек, 04.12.25 /Кабар/. Кытайлык DeepSeek технологиялык компаниясы жасалма интеллект жаатындагы жаңы ийгиликтерин жарыялады. Компания DeepSeek-V3.2 жана анын жогорку өндүрүмдүү версиясы — DeepSeek-V3.2 Speciale моделдерин сунуштады. Бул тууралуу Казинформ агенттиги жазды.
Маалыматка караганда, жаңы моделдер жакшыртылган окутуу протоколу жана мыкты машыгуу аркылуу GPT-5 деңгээлине тең көрсөткүчтөргө жетүүгө мүмкүнчүлүк берген.
DeepSeek-V3.2 натыйжалуулук менен татаал логикалык ой жүгүртүү мүмкүнчүлүктөрүнүн ортосунда тең салмактуулукту камсыз кылса, DeepSeek-V3.2 Speciale версиясы GPT-5тен ашып түшөт жана Gemini 3.0 Pro деңгээлинде ой жүгүртүү тапшырмаларын аткара алат.
Мындан тышкары, DeepSeek-V3.2 Speciale модели 2025-жылкы Эл аралык математика жана информатика олимпиадаларында алтын медаль жеңип алган.
Учурда дүйнөлүк жасалма интеллект жаатындагы атаандаштык курчуп баратат. OpenAI өзүнүн жаңы GPT-5 моделин тааныштырса, Google ноябрь айында жаңы Gemini 3.0 Pro системасын ишке киргизген.
