Бишкек, 15.06.26. /Кабар/. Кара-Кулжа райондук жалпы дарыгерлик практика борборунда (ЖДПБ) акыркы эки жылда медициналык кызмат көрсөтүүнүн сапатын жогорулатуу багытында ири өзгөрүүлөр жүрүүдө. Бул тууралуу Саламаттык сактоо министрлигинен билдиришти.
Борбордун директору Кайратбек Алымкуловдун айтымында, учурда оорукана акыркы үлгүдөгү жасалма дем алдыруучу аппарат, ультра добуштуу изилдөө, эхокардиография аппараттары, ЛОР-комбайн жана заманбап лабораториялык жабдуулар менен камсыз болду. Бул бейтаптарды облус борборуна жөнөтпөй, жергиликтүү деңгээлде так диагноз коюуга шарт түзөт.
"Ош облусун өнүктүрүү фондунун колдоосу менен 12 млн сомго жаңы тамак-аш блогунун курулушу башталды. Ошондой эле балдар бөлүмүн капиталдык оңдоого 5,5 млн сом бөлүнүп, төрөт бөлүмүн жаңылоо пландалууда. Алыскы тоолуу айылдарда жаңы ФАП жана Үй-бүлөлүк дарыгерлер тобунун имараттары курулууда", - дейт ал.
Алымкулов белгилегендей, райондо жалпы практикадагы дарыгерлердин тартыштыгы байкалууда (иштегендердин көбү пенсия курагындагылар). Бирок акыркы убакта жаш адистердин саны акырындап көбөйүп жатат.
Кара-Кулжада ЖДПБнын жаңы, заманбап имаратын куруу боюнча долбоорлоо иштери башталды. Эң башкысы, жаңы комплекс менен бирге жаш дарыгерлер үчүн кызматтык жатакана куруу да пландалууда.
"Биздин максат - Кара-Кулжанын тургундары райондун чегинен чыкпай эле өз убагында сапаттуу медициналык жардам алуусун камсыздоо", - дейт мекеме жетекчиси.
