Бишкек, 16.05.26 /Кабар/. Министрлер кабинетинин төрагасынын биринчи орун басары Данияр Амангелдиев Мордовиянын башчысы Артем Здунов жана Чувашиянын башчысы Олег Николаев менен сүйлөшүүлөрдү жүргүздү.
Жолугушуу "Россия — Ислам дүйнөсү: KazanForum 2026" эл аралык экономикалык форумунун алкагында орун алды.
Артем Здунов менен болгон жолугушууда соода-экономикалык өз ара аракеттенүүнү активдештирүүгө жана бизнес-коомчулуктардын ортосундагы түз байланыштарды колдоого негизги басым жасалды.
Тараптар диалогдун улантуулугун белгилеп, ушул жылы Кыргызстанда өтө турган 12-Кыргыз-Россия аймактар аралык конференциясына даярдыктарды талкуулашты.
Данияр Амангелдиев Мордовиянын расмий жана ишкер делегацияларын инвестициялык өнөктөштүктү кеңейтүү үчүн аталган аянтчага келүүгө чакырды.
Чувашиянын башчысы Олег Николаев менен болгон жолугушууда тараптар бекем өнөктөштүк байланыштарды түзүү келечегин талкуулап, мындан аркы өз ара аракеттенүүнүн контурларын белгилешти.
Сүйлөшүүчүлөр сектордук кызматташтыкты өнүктүрүүгө, бизнестин жана туризмдин чөйрөсүндөгү биргелешкен долбоорлорду ишке ашырууга, ошондой эле маданий-гуманитардык байланыштарды чыңдоого көңүл бурушту.
Данияр Амангелдиев бул жолугушуу Кыргызстан менен Чувашиянын ортосундагы узак мөөнөттүү кызматташтык үчүн ишенимдүү негиз болоруна ишенимин билдирди.
Сүйлөшүүлөрдүн жыйынтыгында тараптардын талкууланган демилгелерди практика жүзүндө ишке ашырууга даярдыгы ырасталды.
