Бишкек, 15.05.26. /Кабар/. Министрлер кабинетинин төрагасынын биринчи орун басары Данияр Амангелдиев "Россия — Ислам дүйнөсү: KazanForum 2026" эл аралык экономикалык форумунун аянтчасында өнөктөш өлкөлөрдүн делегация башчылары менен бир катар эки тараптуу жолугушууларды өткөрдү.
Өзбек тараптын демилгеси менен өткөн Өзбекстандын премьер-министринин орун басары Жамшид Ходжаев менен болгон сүйлөшүүлөрдүн жүрүшүндө эки тараптуу кызматташуунун актуалдуу маселелеринин кеңири чөйрөсү жана мурда жетишилген макулдашуулардын аткарылышы талкууланды.
Данияр Амангелдиев өз ара аракеттенүүнүн оң динамикасын канааттануу менен белгилеп, өлкөлөр ортосундагы мамилелер достуктун, ынак коңшулуктун жана ар тараптуу стратегиялык өнөктөштүктүн бекем пайдубалында өнүгүп жатканын баса белгиледи.
"Биз соода-экономикалык, инвестициялык, энергетикалык жана маданий-гуманитардык тармактарда биргелешкен долбоорлорду активдүү илгерилетип жатабыз. Региондор аралык кызматташтыкты өнүктүрүү өзгөчө мааниге ээ, ал биздин экономикалык байланыштарыбыздын кыймылдаткычы болуп саналат. Тиешелүү "жол карталарында" бекитилген макулдашуулар ийгиликтүү ишке ашырылууда", - деп белгиледи Кыргызстандын министрлер кабинетинин биринчи төрагасынын орун басары.
Тараптар энергетика, айыл чарба, бизнести өнүктүрүү жана биргелешкен долбоорлорду ишке ашыруу маселелерин кеңири талкуулап, бардык деңгээлдеги байланыштардын жогорку темпин колдоого даяр экендиктерин ырасташты.
Ошондой эле форумдун аянтчасында Данияр Амангелдиевдин Афганистандын жогорку билим берүү министри Неда Мохаммад Надим баштаган делегациясы менен жолугушуусу болду. Маектешүүнүн жүрүшүндө тараптар гуманитардык кызматташуу, ошондой эле билим берүү тармагындагы өз ара аракеттенүү маселелерин талкуулашты.
Өзгөчө көңүл биргелешкен демилгелерди ишке ашыруу маселелерине бурулду. Афган тарап илим жана жогорку билим берүү тармагында тажрыйба алмашууга кызыкдар экенин билдирди.
Жолугушуунун соңунда министрлер кабинетинин төрагасынын биринчи орун басары өлкөнүн өз ара кызыкчылык туудурган бардык тармактарда конструктивдүү диалогго даяр экенин ырастады.
