Бишкек, 10.06.26. /Кабар/. Саламаттык сактоо министри Дамир Осмонов Арчалы айылындагы "Максат" реабилитациялык борборунун ишмердүүлүгү жана өзгөчө муктаждыктары бар балдарга көрсөтүлүп жаткан жардамдын шарттары менен таанышты. Бул тууралуу ведомстводон билдиришти.
Анда министр борбордун дарыгерлери менен балдардын церебралдык шал оорусу (ДЦП), аутизм, Даун синдрому бар балдарды медициналык реабилитациялоо тутумун өркүндөтүү жана борбордун базасында заманбап инфраструктураны түзүү демилгелерин талкуулады.
Осмонов өлкөдө бул кызматты өнүктүрүү мамлекеттик саясаттын негизги багыты экенин белгиледи.
"Ар бир бала жашаган жерине карабастан сапаттуу жана өз убагындагы реабилитациялык жардамга жеткиликтүү болушу керек", - деди министр.
Иш-чаранын жыйынтыгында министрликтин тиешелүү түзүмдөрүнө балдарды реабилитациялоо муктаждыктарын талдап чыгуу жана келечектүү долбоорлорду ишке ашыруу механизмдерин иштеп чыгуу тапшырмасы берилди.
