Бишкек, 06.08.26. /Кабар/. Чүй районунда жарандарды кибер алдамчылыктан коргоого багытталган “Кибер алдамчылык” аталышындагы профилактикалык рейд өтүп жатат.
Чүй облустук милициясынын маалыматына ылайык, иш-чара 5-августтан 10-августка чейин уюштурулуп, анын алкагында калк арасында түшүндүрүү иштери жүргүзүлүүдө.
Иш-чара учурунда милиция кызматкерлери интернет жана байланыш каражаттары аркылуу жасалган алдамчылыктын кеңири тараган ыкмалары тууралуу айтып, жарандарга белгисиз чалууларга ишенбөө, банктык карталардын маалыматтарын жана SMS-коддорду үчүнчү жактарга бербөө боюнча эскертүүлөрдү берүүдө.
Ички иштер органдары жарандарды шектүү аракеттерге туш болгон учурда дароо милицияга кайрылууга чакырат.
