Бишкек, 06.08.26. /Кабар/. Министрлер кабинетинин төрагасынын орун басары – суу ресурстары, айыл чарба жана кайра иштетүү өнөр жайы министри Эрлист Акунбеков Чүй облусунда курулуп жаткан "Агро Куш Кемин" өндүрүштүк комплексине барып, долбоордун ишке ашырылышы менен таанышты.
Ведомстводон маалымдашкандай, комплекстин курамына инкубатор, бройлер тоокторун өстүрүүчү аянттар, саатына 30 тонна кубаттуулуктагы комбикорм заводу жана даяр продукцияны сактоочу муздаткыч кампа кирет.
Долбоор толук ишке берилгенден кийин өндүрүш кубаттуулугу жылына 15 миң тоннага чейин жетип, комбикорм өндүрүү көлөмү 115 миң тоннага чейин көбөйөт. Ошондой эле ишкана жергиликтүү фермерлерден жыл сайын 78 миң тоннадан ашык жүгөрү жана буудай сатып алууну пландоодо.
Эрлист Акунбеков бул долбоор өлкөнүн азык-түлүк коопсуздугун чыңдоого, импортту алмаштырууга, жаңы жумуш орундарын түзүүгө жана жергиликтүү айыл чарба өндүрүүчүлөрүн туруктуу рынок менен камсыздоого өбөлгө түзөрүн белгиледи.
