Бишкек, 12.06.26. /Кабар/. Ички иштер министринин орун басары Октябрь Урмамбетов туристтик сезондун алкагында Чүй жана Ысык-Көл облустарындагы милиция кызматкерлеринин даярдыгын текшерди.
Ведомствонун маалыматына караганда, жол кыймылынын коопсуздугун камсыздоо кызматкерлеринин материалдык-техникалык базасы, саптык даярдыгы жана туристтер менен иштөө маданияты өзгөчө көзөмөлгө алынды.
Текшерүүнүн жыйынтыгында жаңы кызматтык унаалар, ылдамдыкты өлчөөчү радарлар, боди-камералар жана "Автоураган" тутумдарынын иштөө тартиби каралып, аларды натыйжалуу колдонуу тапшырылды.
Мындан тышкары, жолдо бара жаткан айдоочулар токтотулуп, ылдамдыкты ашырбоо, каршы тилкеге чыкпоо боюнча нускамалар берилип, туристтер үчүн атайын маалыматтык буклеттер даярдалды.
Ошондой эле өлкөгө келген ар бир конокко сылык, маданияттуу мамиле жасап, Кыргызстандын оң имиджин калыптандыруу ар бир кызматкердин негизги милдети экени эскертилди.
"Жол коопсуздугун камсыздоодо заманбап технологияларды натыйжалуу колдонуу менен бирге, жогорку кызматтык маданиятты сактоо шарт", - деди Урмамбетов.
Министрдин орун басары жол кырсыктарын болтурбоо максатында кооптуу тилкелерди кайрадан талдап чыгууну жана кошумча көзөмөл постторун уюштурууну тапшырды.
